Авралт бурхандаа мөргөе.
Ариун номоо дээдэлж,
Асралт хуврагтаа сүсэглэе.
Ум мани бадмэ хум.
Цагаан сүүгээр тэжээсэн
Ээжийн ачийг яндашгүй,
Гэгээн номоор гийгүүлсэн
Багшийн ачийг хэмжишгүй.
Ум мани бадмэ хум.
Салхинд хөөгдсөн үүл шиг
Сарниж оддог нас шүү,
Усанд тогтсон хөөс шиг
Урваж оддог бие шүү.
Ум мани бадмэ хум.
Ашиг алдрын зэрэглээг
Хөөж яахин гүйцэх вэ,
Аминч хүслийн цангааг
Тайлж яахин барах вэ.
Ум мани бадмэ хум.
Мөнгөөр аргалж болдоггүй
Мөнх бусыг санаарай,
Өнгөөр хуурч болдоггүй
Үйлийн үрийг бодоорой.
Ум мани бадмэ хум.
Энэ ертөнцийг мэхлэвч
Эрлэгийг мэхэлж чадах уу,
Эцэст жаргалыг горьдовч
Тамыг алгасч дөнгөх үү.
Ум мани бадмэ хум.
Үхэх, төрөхийн орчилд
Үнэн чанарыг таниасай,
Жаргах, зовохын ээлжинд
Буян нүглийг ялгаасай.
Ум мани бадмэ хум.
Арван хар нүглээ
Гэмшин байж наманчилъюу.
Арван цагаан буянаа
Баясан байж хөгжөөюү.
Ум мани бадмэ хум.
Өнчин доройг асарвал
Үрийн буянаа нэмнэ шүү,
Өтгөс буурайг өргөвөл
Насны буянаа нэмнэ шүү.
Ум мани бадмэ хум.
Үгээгүү ядууг тэтгэвэл
Эдийн буянаа нэмнэ шүү,
Үлэмж мэргэдийг хүндэлбэл
Эрдмийн буянаа нэмнэ шүү.
Ум мани бадмэ хум.
Өглөгийн үрээр баяжина л,
Хомхой сэтгэлээ даралтай,
Үнэн журмаар дэвжинэ л,
Хуурмаг явдлаа орхилтой.
Ум мани бадмэ хум.
Өглөг өглөгийн дээд нь
Номын өглөг юм шүү,
Өмөг өмгийн дээд нь
Багшийн өмөг юм шүү.
Ум мани бадмэ хум.
Өөрийн төлөө явсаар
Өөдлөх нь үгүй зүдэрдэг ээ,
Өрөөлийн төлөө явсаар
Уруудах нь үгүй дэвшдэг ээ.
Ум мани бадмэ хум.
Энэрэл хайрын хураар
Хилэнгийн түймрийг дараарай,
Эрдэм билгийн гэрлээр
Мунхгийн харанхуйг арилгаарай.
Ум мани бадмэ хум.
Адгуу догшин сэтгэлийн
Жолоог залахад бэрх шүү,
Арга билгийн ухаанаар
Аяыг нь тааруулэ номхотгоорой.
Ум мани бадмэ хум.
Үнэн гэж үзэгдэвч
Үнэмлэхүй утгыг эрээрэй,
Би гэж хөөрөлхөвч
Билиг барамидыг судлаарай.
Ум мани бадмэ хум.
Ухаарч шинжвэл хоосон
Усанд туссан сар аа,
Нотлон шинжвэл хоосон
Нойронд ургасан зүүд ээ.
Ум мани бадмэ хум.
Ариун бодийн мөртөө
Алгасрал үгүй шамдалтай,
Авралт хутагтын номдоо
Алдралт үгүй хичээлтэй.
Ум мани бадмэ хум.
Эцэг богд ламыгаа
Эгшиг шүлгээр тахиюу,
Эх болсон амьтдыгаа
Энэ сургаалаар ачилъюу.
Ум мани бадмэ хум.
Агшин зуур ч хагацалгүй
Арьяабал минь тэтгээрэй,
Аюул бүхнээс гэтэлгэн
Адистид юугаа хайрлаарай.
Ум мани бадмэ хум.
Шинэхэн тараг шиг буян нь
Бодийн хөрөнгө болтугай,
Шижир алт шиг сургаал нь
Сэтгэлийн ариусал болтугай.
Ум мани бадмэ хум.
http://www.mongoliantemple.com/ArticleDetails.aspx?MenuId=1&ArticleID=72Сайн үйлс дэлгэрэх болтугай
.